以爱情为题材的客家山歌：
韭菜打花细浓浓，阿妹恋哥唔嫌穷。
只要二人情意好，冷水泡茶慢慢浓。
阿妹割草落岭岗，想起山下驶牛郎。
唔怕石头踢脚趾，只骂路狭唔骂郎。
硬硬石头打得开，打开石头烧石灰。
哥系石灰妹系水，石灰见水心花开。
口唱山歌脚步轻，三步当作二步行；
只爱高兴心欢喜，唔怕肩头百斤担。
哪个愁来冇妹愁，着件烂衫冇肩头；
日晨换衫冇衫换，夜晚洗衫冇日头。
别人有钱哥唔贪，阿妹穷来哥唔嫌；
铁打锅嫲任你煮，冇鱼冇肉也鲜甜。
客家山歌系出名，条条山歌有妹名；
条条山歌有妹份，一条冇妹唱唔成。
晓唱山歌歌驳歌，晓织绫罗梭驳梭。
妹拉胡弦哥扯线，晓弹晓唱花样多。
八月十五月亮圆，生果月饼层数层。
阿妹有情哥有义，交个人情万万年。
阿哥出门去南洋，唐山隔番路途长。
鸳鸯枕上无双对，壁上灯草挂心肠。
凤岗出海七洲洋，七日七夜水茫茫。
行船三日唔食饭，记妹言语当干粮。
想见情郎夜难熬，见到情郎面发烧；
铁打荷包难开口，石板劏鱼难落刀。
白白净净我不贪，乌乌黑黑我不嫌；
好比小孩摘稔食，一只乌来一只捻。
八月草来花耀耀，一群亚妹割草烧。
中间被哥挑减只，我家柴草任你挑。
敢唱山歌敢大声，敢放白鸽敢响铃。
你系有心同厓讲，灯草搭桥也敢行。
你莫嫌厓耕田郎，耕田阿哥情义长。
厓唔抽烟唔赌博，家中有事齐商量。
阿哥好比番薯苗，被妹拦腰割一刀。
割来做种还过得，割来煮潲命都冇。
以生产生活为题材的客家山歌：
高攀富贵厓冇心，一生安乐在山林。
朝尝甘露夜带月，整日山歌伴百禽。
放牛早起日暮归，短笛冇腔信口吹。
人爱暖饱牛爱肥，唔管闲是与闲非。
掌牛阿哥好凄凉，番薯芋仔作口粮；
风吹雨打冇人问，晚睡牛栏到天光。
掌牛阿哥好凄凉，戴顶笠麻又冇框；
喝尽几多田沟水，淋湿几多烂衣裳。
日出东边一点红，有人富贵有人穷；
有人担柴路上走，有人戴笠在田中。
今朝早起乱如麻，不知柴米在谁家；
担起担竿路上走，肚里饿得唔晓行。
捡柴割草过岭岗，插秧割禾我在行。
担竿锄头不离手，从早做到日落光。
做人媳妇真系难，朝朝都爱起五更。
灶头镬尾爱洗净，担水舂米无时闲。
凄凉凄凉凄凉凄，掌牛阿哥受人欺。
手拿牛绳长七尺，饥饿寒冷无人知。
手中葵扇画麒麟，两人讲过千年情；
亚哥勇敢去杀敌，阿妹在家你放心。
雕仔冇翼难过山，大船冇水搁浅滩；
木头唔硬难烧炭，亚哥唔穷唔“过番”。
责任编辑：
